2012-02-23
有一段時間沒有推出唱片的林憶蓮，昨日加盟環球唱片，雖然坊間盛傳因她加盟而加速謝安琪的離開，不過憶蓮淡然否認此事，並說：「我冇聽過，亦同我完全無關。」身兼老闆的憶蓮，坦言沒有計投資數字，只希望做代表自己的音樂。
憶蓮昨日出席加盟環球唱片的簽約記者會，會上她獲贈結他和價值六位數字的私家咪。談到有指今次以800萬簽約兩年，憶蓮說：「今次係簽約兩年，計劃出兩張國語和一張廣東碟，但我要再一次澄清，今次係公司同公司之間拆帳形式合作，我會負責音樂製作部份，環球負責發行同推廣；近幾年我都係用呢個模式合作，以目前唱片嘅經營環境嚟講，對大家都公平。」
冇計投資金額
至於在音樂部份的投資，憶蓮表示：「我冇計自己喺製作公司投資咗幾多錢，最緊要係做好唱片質素，同埋可以製作代表自己嘅音樂。」有指因她的加盟而踢走謝安琪（Kay）一事，憶蓮說：「我冇聽過，亦同我完全無關，我反而覺得加入大家庭，一班歌手各有各風格同特質。」
只以短訊接觸
此外，環球高層黃劍濤表示今次與憶蓮合作，是因為大家的理念接近，不過實際數字不便透露。問到Kay的去向問題？他說：「我哋家都努力傾緊，不過主要係同佢經理人傾，要尊重遊戲規範，同阿Kay係以短訊接觸。」據知Kay將在下月舉行音樂會，問到會否是告別作？他說：「咁又唔好咁講，呢個唔係適當時候去講，總之我哋希望盡快解決呢件事。」
No comments:
Post a Comment