林憶蓮噚晚喺《歌手2017》第一回合排第二名，贏咗曾經教過佢唱歌嘅老師杜麗莎，杜麗莎僅次憶蓮攞第三。
許愿曾經係憶蓮唱片監製同男友，《蘋果》記者今日打比許愿，佢有睇噚晚《歌手2017》，問佢覺得憶蓮及杜麗莎邊個唱得好啲時，許愿話:「兩個唱功都唔同，好難比較。杜麗莎個氣場好大，佢自己之後都有喺節目講，自己唱到某啲地方有小小飄咗，但我覺得呢樣嘢唔足以影響佢整體表現。至於憶蓮，我搵唔到任何問題，初初我仲以為佢係播帶O添，太完美。」
講番杜麗莎當年教憶蓮唱歌，其實係許愿搵杜麗莎幫忙，許愿話:「當年杜麗莎失聲，去美國搵醫生，醫生比咗個技巧佢練唔同嘅聲。其實杜麗莎冇諗過做老師，嗰時憶蓮出咗《灰色》，我覺得我教憶蓮只係好皮毛嘅嘢，唔識教佢唱歌技巧，所以搵咗香港首席女高音江樺教憶蓮唱高音，之後又搵咗杜麗莎用佢喺美國學嘅技巧教憶蓮唱流行曲技巧，所以憶蓮進步得咁快。」
蘋果 :【歌手互選第一】林憶蓮師徒對決領先 杜麗莎：說明我是好老師
2017-01-22
噚晚借住「被消失」嘅張敬軒成功炒番熱嘅《歌手2017》（前名《我是歌手》）終於播咗第一集，一如以往，台下反應一樣咁「熱烈」，觀眾交足戲，又喊又嘟嘴又係咪都起身拍手掌歡呼……真係想頒個最佳新演員獎俾呢班觀眾呀！
而台上嘅7位歌手（未計軒仔），其實都係落力演唱嘅，其中就有唱功絕對係頂尖、教唱歌嘅杜麗莎！佢喺節目入面排喺光良後面出場（原本兩人中間係軒仔唱），揀咗唱約翰連儂（John Lennon） 嘅英文歌《Imagine》，先唔理台下觀眾聽唔聽得明英文，但就俾同場嘅歌手互選中，成為咗並列第一位。
講起同場嘅歌手，其餘幾位參賽者入面，就有林憶蓮同袁婭維跟過杜麗莎學唱歌，三位喺《歌手》入面師徒對決，第一集就俾林憶蓮領先排第二位，杜麗莎就得第三，袁婭維暫時就包尾。
其實杜麗莎之前喺大陸記招已經講過，要同林憶蓮分勝負唔會尷尬，仲超級大方話：「如果真的被她打敗了，說明我是個好老師，教出的學生夠棒。」
No comments:
Post a Comment