東方日報 : 軒仔為憶蓮被公司照肺

2008-10-10
張敬軒（軒仔）於今日推出《拉闊變奏廳》VCD 及DVD ，由於音樂會是翻唱其偶像林憶蓮的經典作品，故軒仔由揀歌、rundown 編排，甚至度台詞等，都是一手包辦，他更斗膽向唱片公司要求以高幾倍成本的高清攝影器材拍攝整個音樂會，但唱片公司卻認為他此舉如賭命，早前就因製作費過高而被召回公司「照肺」。
軒仔不諱言：「高層鬧我做自己張唱片都冇咁緊張，仲話如果唱片賣唔夠數，就要我『啃』番晒，我覺得有種要博一鋪嘅感覺。」軒仔透露這唱片製作成本超高，因要花錢購買歌曲版權，他說：「憶蓮好多歌嘅版權都係以美金計，要同外國公司傾，我諗單係版權費都要成幾十萬港幣㗎。」他說估計唱片起碼要賣過萬五張才封蝕本門，故擔心蝕到入肉。他又說最美中不足是憶蓮兩首大熱歌《微涼》及《灰色》，因找不到版權人，故未能收錄在碟中。