Saturday, March 26, 2016

東網 : 林憶蓮喊到眼妝都溶 男友恭碩良撐開騷

2016-03-26
林憶蓮一連四場《2016林憶蓮PRANAVA/造樂者世界巡迴演唱會》香港站開鑼,相隔四年再踏紅館的憶蓮Fit爆登台,全晚換上多套靚衫,大部份以黑色為主,亦利用巨大銀幕投射不同圖案及畫面,唱家班的憶蓮亦載歌載舞,令全場觀眾企起身狂揈High爆,憶蓮不時向歌迷鞠躬答謝,下月踏入50歲的憶蓮非常前衛,雙手內側、背脊均畫上紋身,極度搶眼,而憶蓮男友恭碩良則擔住鼓手。
喊到甩眼妝
憶蓮以長裙唱出《蓋亞》登場,當唱到《為你我受冷風吹》時感動淚眼,搞到眼妝都甩晒,要化妝師上台補妝,接住憶蓮即向大家打招呼:「多謝大家,呢啲係感動同開心嘅眼淚,好開心見到大家,你哋好嗎?今晚見到大家好感動同激動。」隨即透露上次紅館騷已是2012年,她說:「依家已經係2016年,時間過得好快。」
翻唱舊歌重拾感覺
憶蓮唱到《微涼》時,她說:「其實我啱啱做完廣東專輯,呢張新碟對我嚟講好大意義,因為我揀咗我嘅童年、成長、青春期好鍾意嘅歌,好有意思。」她坦言好鍾意歌詞「鹹魚白菜也好好味」,她說:「雖然我哋過住好奢華生活,我記得細個嘅時候,食簡單餸菜最有味道,依家好似食唔返呢啲味道,所以新專輯重新翻唱咗心目中代表香港重要嘅階段,香港人更加需要搵返積極、樂觀、向前的精神。」
個唱期間,憶蓮穿上黑色露腰超短裙大唱大跳《不還你》、《瘋了》、《燒》及《震撼》快歌,全場歌迷即起身狂扭,憶蓮笑稱首場演唱會一定有蝦碌事,她說:「演唱會揀歌真係三番四次,揀歌過程中希望大家都想聽,我哋之前係到綵排,忙到最後一刻出場都仲改緊衫,其實後台花絮好精彩,後台係裙拉褲甩。」唱到最後一首歌《至少還有你》時,憶蓮說:「好多謝你哋,見你哋咁享受音樂,其實我哋都好開心,因為我哋一直籌備就係得到呢刻,大家Enjoy一齊睇,大家度過毫無壓力、消解壓力嘅晚上。」



蘋果 : 林憶蓮紅館開騷性感登場 觀眾喪叫Encore唔肯走
2016-03-26
林憶蓮喺紅館舉行1連4場演唱會,噚晚係頭場,男友恭碩良有份做鼓手。
憶蓮喺服裝方面花咗唔少心思,有騷腿、露膊同大露背裝,仲刻意露出佢為今次個唱整嘅假紋身,不過成晚又唱又嘅佢跳,去到尾聲時,右手臂個紋身就嚟頂唔住,化化哋。
憶蓮又唱又跳,有快歌medley,又唱咗多首經典,唱《至少還有你》嘅時候全場大合唱,氣氛好好。唱到《為你我受冷風吹》嗰陣仲感動落淚o添。佢提到最近錄咗新專輯,入面嘅歌係自己嘅回憶,全部都好有感受。
憶蓮全晚encore過1次,11點就完騷,觀眾梗係唔收貨,紅館開大燈都唔肯走,大會廣播過好多次叫人走,觀眾都繼續叫encore,但係億蓮係冇再出場。

蘋果 : 林憶蓮紅館開騷恭碩良做鼓手 唱經典名曲感動落淚
2016-03-26
林憶蓮嘅紅館個唱噚晚係頭場,音樂人男友恭碩良擔任鼓手。憶蓮唱咗好多經典歌,唱到《為你我受冷風吹》時感動落淚,搞到要工作人員幫佢抹眼淚,佢話係因為見到觀眾好開心,大家放假心情靚靚。憶蓮話﹕「2012年喺紅館開演唱會,眨眼就到o依家,今晚嘅歌都係精挑細選,最近錄咗隻新廣東專輯,揀嘅歌都係自己嘅童年、成長、青春期回憶。」
佢仲點名好鍾意阿Lam(林子祥)嘅《分分鐘需要你》,都有收入隻碟度,憶蓮話:「歌詞好有意思『鹹魚白菜也好好味』,諗番起o依家大家生活都過得好奢華,而我哋細細個食嘅菜好簡單,但係最有味道,呢種味道o依家食唔番,新專輯重新翻唱好多自己有感受嘅歌 ,香港喺我心目中好重要,港人更加需要搵番積極、樂觀嘅精神,向前繼續行,呢首歌好有意義。」

蘋果 :【圖輯】林憶蓮紅館演唱會 世界級台‧燈‧聲
2016-03-26
林憶蓮喺紅館舉行一連四場演唱會,噚晚係頭場,男友恭碩良有份做鼓手,又有多位歌手嚟到撐場。成個演場會由憶蓮嘅服裝到舞台設計,都落足心機。靚聲唔在講,視覺效果都冇得輸,唔怪得入場嘅觀眾睇到唔捨得走。冇買飛或者未去睇嘅朋友唔使驚,o依家有相睇可以止住渴先!

No comments: