Monday, January 30, 2017

蘋果 : 【「X叫」得天下】迪瑪希升Key三次飆高音攞第一 林憶蓮衰太穩陣

2017-01-29
張敬軒被爆遭內地封殺,喺湖南衛視節目《歌手》被消失,於是大家再關注呢個節目!上個禮拜播出嘅第一集,唔少網民都金睛火眼去搵軒仔喺邊。結果就算CG點勁,劇組點努力剪走有佢嘅片段都好,總會喺畫面某個角落,發現紅頭髮嘅軒仔!
由於軒仔喺第一集已經被消失,所以噚晚出街嗰集《歌手》畫面睇落舒服好多,少咗突如其來嘅大特寫,又少咗啲偏左偏右冇中間嘅鏡頭,而且仲可以見到一班歌手坐定定喺休息室wide shot。
不過有啲嘢,點都唔會變,就係台下觀眾嘅反應!
當歌手們喺台上獻唱,台下觀眾都表現得勁入戲,都唔知佢哋係咪真係聽得明。無論係迪瑪希、定係林憶蓮唱緊歌,觀眾照舊如痴如醉、喊晒口,唔講仲以為節目叫《我是觀眾》。
大陸歌唱節目嘅特色,點可以唔提「X叫」!歌手聲嘶力竭地飆高音,台下觀眾跟住high!第一集唱《一個憂傷者的求救》嘅迪瑪希,喺第二集佢又揀咗俄羅斯歌手Vitas嘅作品《Opera2》,相信台下都冇乜邊個聽得明歌詞。不過迪瑪希多次「X叫」硬爆高音,連升3次Key,觀眾就high到企晒起身,完全符合國情!
反觀一向被公認唱功一流嘅林憶蓮同杜麗莎,喺冇「X叫」加持之下,都係輸畀迪瑪希。賽果係迪瑪希第1位、第2位係譚晶、第3位係林憶蓮、第4位係獅子合唱團、第5位係杜麗莎、第6位係袁婭維,排第7位嘅光良於首輪淘汰賽出局!

No comments: