2012-04-29
鼓技了得的恭碩良（Jun）一直在音樂界默默耕耘，最為人熟知的，是他與天后林憶蓮疑幻疑真的戀情。他在演唱會中單膝跪在憶蓮面前，兩人又在澳門孖住嘆豬腦麵，以為藝術家性格的他面對暗撻傳聞會發火，誰知他笑說：「暗撻？葡撻個friend？我只可以話憶蓮係人見人愛、好細心嘅人。」更不避嫌大讚憶蓮夠sweet。
撰文：黃曉妍
恭碩良早前在澳門涉打傷醫生一案，大前日在澳門初級法院開審，Jun被控一項侵入限制公眾進入之地方罪，以及一項加重傷害身體完整性罪。他在法庭上承認傷人，更表示作為公眾人物犯下罪行感到「好醜」，由於案件證人有一定數目，案件將押後至下月24日繼續審理。
「錫得好交關」
通常音樂人都很有性格，問到緋聞都黑面或串嘴來回應，Jun總是會被問到與憶蓮暗撻的緋聞，今次他竟講笑說：「暗撻？葡撻個friend？哈哈，我只可以話憶蓮係人見人愛、好細心嘅人，我哋全隊band都好錫佢，錫得好『交關』。」
Jun不諱言大讚憶蓮：「佢對我哋好好，我唔講佢唱歌幾好聽，佢好sweet，一個咁sweet嘅人只可以好sweet咁對番佢，而且食豬腦麵好補腦，大家可以試吓。」提到在憶蓮個唱中單膝跪地，他風趣回應：「我同個個都有跪，我跪過學友，又攬佢，不過佢唔睬我之嘛！」
向來Jun的鼓技頗受行內尊崇，經常任香港歌手巡迴演出的鼓手，兩代歌神張學友和陳奕迅的世界巡迴演出，都有Jun的份兒。他不諱言若沒有歌手找他做鼓手，沒收入的他何來出新唱片。
新碟即將面世，他說：「呢張碟係我自資，獨立藝人絕對有好大折扣，好厚面皮咁搵人幫手，於是錄五首歌先計兩首歌，仲要追佢開invoice，我哋成日碌人情卡，長遠計，我接到job再彈畀大家，互相支持大家嘅音樂。」
抗拒做鼓王
今次新碟，Jun找來LMF成員阿庭設計封套，不過早前阿庭為樂隊Mr.新碟設計封套被指抄襲，Jun力撐說：「我覺得係大家抄大家，你話我聽邊個發明水，你講得出，我話你叻。冇得去追究嘅，藝術就係藝術，鍾意就鍾意，話抄係廢話，我打鼓夠係抄人，所以『鼓王』呢個名，我好怕，好似恭碩良教人打鼓，我都俾人鬧，點解啲人（網民）咁得閒打一篇嘢，而唔去做一篇真訪問。」
Jun透露新專輯監製來自英國，他坦言從未遇過錄音室勁敵，亦未試過極速完成整張唱片：「可以一日寫兩首歌，除咗收錄八至十首新歌外，仲有一隻特別版DVD，講我呢13年嘅事，以笑嘅形式去講開心事、難苦路，會睇到我真人係點，所以會係50%音樂，50%講嘢，大家都知恭碩良係一個音樂人，不如聽我講嘢吖，希望有啲笑位。」
寫歌還片債
近年偶爾會在電影中看到Jun的演出，他去年更贏金像獎最佳原創電影歌曲：「我冇諗過係為電影而寫，當時我係做唔到部戲，為咗道歉而送首歌畀導演，今年我有提名，好好彩，但係林憶蓮嘅一首歌，做呢首歌嘅時候，我冇份監製，不過我聽mix，我同監製講，呢首歌似係一部電影配樂。」
不再打斷鼓棍
Jun 的音樂熱情源於兒時，自小盼能靠打鼓賺錢，不過他每次打鼓過於用力，演出一場可以打斷五、六枝鼓棍，故百多元的一支鼓棍，他要傾贊助來幫補，最後找到「匠」這間公司贊助他。他自備鼓棍跟歌手到各地做巡迴演唱會，曾試過打斷所有鼓棍：「07年張學友tour，打到所有鼓棍都斷晒，又冇機會去買，嗰次之後，我買咗一對差唔多500元鼓棍，到家都冇斷過，但就唔好打，對雙手又唔好。」
唱K揀舊歌
為了50歲仍能打鼓，Jun笑言要好好保養身體，自小有藥物敏感的他較相信中藥：「我真係頂唔順，要開工先去『啪』支針。」他指打鼓和唱歌都要熱身：「身為好鍾意唱歌嘅鼓手，有時都會揀某啲歌爆一爆，我鍾意去卡拉OK，但要揀啲鍾意唱80年代嘅腳去。近得唱歌朋友多，佢哋會保住條頸唔好凍親，做歌手真係難，都係打鼓好玩啲。」
No comments:
Post a Comment