蘋果日報 : 恭碩良半拖半扶 憶蓮冧變笑女

2014-04-02
【金鐘→灣仔】現年47歲嘅林憶蓮同36歲嘅恭碩良（Jun）譜姊弟戀，已經拍咗拖3年，由本來好低調到今日半公開，成為圈中公認嘅一對，仲有傳佢哋今年底前會拉埋天窗，真係值得替佢哋開心。
上周六下晝4點左右，憶蓮同阿Jun又拍住拖去街，佢哋坐住司機揸嘅車去到金鐘太古廣場，架車一停低，Jun就一支箭咁走去電梯位，憶蓮同司機交帶咗幾句後，佢先抱住個暖水壺落車。年近半百嘅憶蓮見男友掉低佢，一落車就扮嬲鼓起泡腮，但見Jun講咗兩句後，憶蓮即刻爆笑上前會合。佢哋上咗商業大廈逗留咗一個鐘，跟住再由司機接載去咗灣仔星街開餐。
返歸慢慢嘆
落車後，憶蓮扶住Jun條肥腰，雙雙去咗樓上餐廳Beef＆ Liberty食飯，不過撞正周末食飯時間，好多人喺門口等位，見到呢種盛況，Jun轉而叫外賣同叫咗兩杯飲品，方便飲住等。現場好多人都認得憶蓮，不過佢同Jun完全冇避忌咁照企喺度等外賣，Jun仲不時含情默默望住女友，得憶蓮笑到雙眼瞇成一線，明顯非常受落。大概20分鐘後，攞咗外賣嘅Jun讓憶蓮行先，落到樓下仲不時半拖半扶住女友，最後司機載佢哋返赤柱寓所開餐。