2013-02-08 03:26 pm
今日年廿八，又係港人出埠度歲好時節。今早十一點幾，先見到溫拿五虎出動，阿倫話佢哋係去大馬開工，至於趕唔趕到年初一返港？阿倫不置可否，只係笑笑口話﹕「都係嗰啲日子啦﹗」但阿B鍾鎮濤個微博就似係洩露咗佢哋初三返港嘅玄機喇。
機場客運站人來人往……等呀等，啱啱終於等到林憶蓮同佢嘅音樂情人恭碩良雙雙現身。只見恭碩良拎住大件樂器，喺閘口等查證件。記者即刻走埋去同佢哋影番張靚相，二人未有避忌，更加冇黑面，仲笑晒任影，不過恭碩良就用件樂器遮住塊面，唔知係咪怕醜喇。
影咗一陣，都係時候出發喇﹗此時憶蓮忽然化身小鳥依人，主動蹺住恭碩良隻手，再望實男方，甜甜一笑，然後挨咗個頭落男方肩上，冧到不得了﹗恭碩良再同大家講咗句﹕「新年快樂﹗」就同憶蓮甜蜜蜜辦登機手續去了﹗
No comments:
Post a Comment