蘋果即時 :【男友必上台】相隔4年再開紅館騷 林憶蓮獲贈水晶法螺

2016-01-14
相隔四年，林憶蓮將於3月26日起，假紅館舉行三場《林憶蓮PRANAVA/造樂者世界巡迴演唱會》，今日現身尖沙嘴記招，演唱會名為PRANAVA，憶蓮解釋呢個係梵文字，意思是神聖聲音，而今次造樂者嘅名，就好切合自己熱愛創造音樂，同製造快樂畀大家。
演唱會製作上來了大突破，起用台灣名製作人兼憶蓮經理人陳鎮川負責，將會係台灣團隊來港製作。音樂部份當然由憶蓮好友倫永亮負責，當佢被司儀問到需唔需要兩個月唔瞓去諗？一向玩得嘅倫永亮笑指，聽錯為「需唔需要兩個人瞓？」，而黃柏高送上水晶法螺，喻意憶蓮擁有通透天籟之聲，兼且法螺係佛教法器之一，有祝福意思。
記招訪問環節，只由大會司儀發問問題，問到憶蓮會否有大家想見鼓手（男友恭碩良）喺台？憶蓮甜笑話：「梗係有，點會無。」至於會否繼上次演唱後再合唱？佢就指合唱歌好難找，而上次亦都太經典。憶蓮透露現在同步製作廣東及國語碟，演唱會上至少會獻唱一首。
最近擔任內地節目《中國之星》參賽者許志安、常石磊等推薦人，憶蓮指過程中學習到好多嘢，係一個特別體會，尤其係參賽歌手會重新喚起自己對音樂熱誠，今次演唱會，都好想邀請被推薦歌手擔任嘉賓。
憶蓮又指節目中發現好多平時少接觸樂器，兼出色樂手，都希望邀請佢哋來港演奏，而演唱會服飾會繼續近年習慣，將歌服以循環再造設計製作，最後佢呼籲大家要抱住一個開懷同接受新事物心情入場睇，因為製作上跟以往演唱會大不同。