壹週刊 : 咬住35年 林憶蓮惡鬥陳慧嫻

2016-01-28
中學時期是同班同學的陳慧嫻、林憶蓮，由學校鬥到入樂壇，鬥足35年。今年三月，二人更同月開騷繼續鬥。據了解，當林憶蓮得知宿敵申請了三月初的紅館檔期開演唱會後，即落實在同月開騷，咬住唔放！
贏少少都要贏
斷斷續續鬥了三十五年的林憶蓮、陳慧嫻，今年三月又一先一後舉行演唱會，再爭長短。「佢兩個由入樂壇開始，已經將對方當成假想敵。舊年慧嫻搞入行三十周年演唱會，反應好好，已經講明今年會再開，憶蓮就一路留意住慧嫻申請邊個檔期，同時入紙申請，最後慧嫻攞咗三月初，憶蓮就即刻確定自己三月底開，仲要點都要做多慧嫻一場，一定要贏對方！」知情者說。今次二人同樣選擇開三面台，但陳慧嫻用鑽石形三面台，每場觀眾人數會比林憶蓮的三面台多出二千幾人。「四面台最多可以坐一萬一千幾觀眾，但三面台都有兩種，一款係將紅館打橫間開，另一隻係鑽石形舞台，普通三面台坐七千觀眾，但鑽石形就坐到九千幾人。所以如果係計觀眾總人數，憶蓮嘅四場同慧嫻三場，人數其實差唔多！」
鬥成績慧嫻勝
陳慧嫻、林憶蓮同畢業於名校瑪利諾書院，二人在讀書時已經比鬥成績；在校內是風頭躉的慧嫻，無論學業成績，以至校內活動及歌唱比賽，都凌駕於林憶蓮。加入樂壇後，二人更加鬥到難分難解。「慧嫻八三年唱《逝去的諾言》已經紅咗，佢亦比憶蓮早兩年入樂壇。兩個爭得最勁係八八、八九嗰兩年，慧嫻八九年開首個個人演唱會開咗六場，之後到憶蓮開，佢亦一樣要做六場，跟住慧嫻去咗美國讀書，兩個都冇嘢好鬥，憶蓮九三年開咗十場演唱會，九六年慧嫻『回歸』開騷，亦堅持做十場平憶蓮紀錄！」早於八六年，兩人撞到正！同時揀中南翔子作品做改編歌，陳慧嫻唱《Love Me Once Again》，硬砌林憶蓮的《長街中一角》。「因為改編埋同一首歌，兩個都好緊張，憶蓮更加專登早過慧嫻兩日，將首歌派上電台，要飲頭啖湯，真係乜都有得爭！不過當時《Love Me Once Again》明顯比較受歡迎，嗰時憶蓮都唔係咁開心！」知情者說。
錯誤決定
八七年，令林憶蓮爆紅的《灰色》，原本是揀給陳慧嫻，但她聽完唔鍾意，但林憶蓮卻憑此歌銷量、口碑雙贏，錯手益咗對手，此事是二人難分難解的原因之一。即使做過同班同學，但兩人由細到大都唔啱key。九○年，慧嫻去美國讀書前，曾在早一屆的瑪利諾師姐劉美君拉攏下，一齊飯聚，但陳慧嫻和林憶蓮齋食唔傾，彼此一句說話都冇講過，唔妥到出面。由上世紀爭到二○一六年，兩個加埋成百歲，依然好勇鬥狠！
陳慧嫻（Priscilla）
年齡：50歲學歷：美國雪城大學心理學全優生主要獎項：港台新人獎（1984年）《傻女》無綫勁歌及港台中文金曲十大金曲獎（1988年）商台叱咤女歌手銀獎（1988年）《千千闕歌》叱咤我最喜愛歌曲（1989年）《夜機》十大中文金曲獎（1989年）
感情生活：曾公開三段感情，並表示三段關係都令她受很多傷害。
區丁玉早年，與寶麗金年代的唱片監製區丁玉撻着，二人拍拖六年，91年分手，翌年前度火速結婚，令陳慧嫻非常傷心。
張卓文95年陳慧嫻學成回歸，96年開演唱會搭上形象顧問張卓文，當時男方以事業為重，二人聚少離多，02年分手收場。
謝國麟02年，患上焦慮症的陳慧嫻重遇多年冇聯絡的謝國麟醫生，二人火速撻着，03年，更在演唱會上向對方發表愛的宣言，這段情維持到07年玩完，分手後慧嫻表示曾拒絕前度求婚。
林憶蓮（Sandy）
年齡：49歲學歷：中五畢業主要獎項：叱咤樂壇女歌手金獎（1990年至1992年）叱咤樂壇至尊唱片大獎（1993年）第24屆金曲獎「最佳國語女歌手獎」、「最佳專輯製作人獎」及「最佳國語專輯」音樂風雲榜「最佳女歌手」（2001年）及「最受歡迎女歌手」（2002年）華語音樂傳媒大獎最佳國語、粵語女歌手及年度藝人（2013年）
感情生活：入行31年，林憶蓮與不少圈內人傳過緋聞，包括陳輝虹、李進、馮鏡輝等，但正式公開被承認的男友，只有四個。
許愿87年，搭上其形象指導及排舞老師許愿，戀情公開後，二人合資搞製作公司星工廠，91年宣布分手。
李宗盛92年，林憶蓮與李宗盛合唱《當愛已成往事》撻着，林憶蓮以第三者身份介入；98年，有咗餡的憶蓮與李宗盛在加拿大拉埋天窗，並誕下女兒李喜兒，04年，二人各自憑歌寄意，宣布六年婚姻畫上句號。
陳輝虹回復單身後，火速與陳輝虹舊情復熾，但維持短短兩年，有指男友不獲李喜兒接受，導致二人再分手。
恭碩良11年，林憶蓮被踢爆與音樂人恭碩良相戀，其後愈愛愈高調，更在fb發聲明，承認與對方熱戀中。