詞神林振強（Richard）前日逝世十周年紀念日，張學友、林子祥、林憶蓮、倫永亮、陳慧嫻和劉美君前晚假亞洲國際博覽館舉行「追憶林振強」音樂會，真情流露演繹故友作品悼念，有觀眾感動到眼濕濕。
壓軸演出的學友感慨地說：「Richard嘅童真同童心係佢同其他填詞人嘅分別，我非常有幸唱好多佢寫嘅歌，作為一個歌手，我仲有一個特權，就係偷偷去窺探佢內心世界，佢對我影響好深，《每天愛你多一些》、《真情流露》、《愛是永恒》，誇張啲去講，其實都唔誇張，如果冇林振強就冇今日嘅張學友。」全場拍掌支持，掀起高潮。
穿黑色低胸裙的憶蓮跟倫永亮合作表演，她說：「我對Richard嘅傾慕、尊敬同愛係好深遠，佢好可愛幽默，又係一個好感情化嘅人，佢喺香港樂壇立下好多豐功偉績。」倫永亮透露20多年前自己未入行，有次揸車在收音機聽到首歌，感動到不停哭，就是林振強寫給陳潔靈的《當天那真我》，他叫觀眾為林振強歡呼一聲，全場和應很震撼。
將榮升祖母的劉美君專程返港演出，她笑說：「Richard好錫我，佢知我好多秘密，爆我嘢一定暗殺佢；佢畀我作品入到屋，但我入唔到佢間屋，今晚喺後台先見到林太同佢囝囝。」擔任特別嘉賓的陳慧嫻送上《千千闕歌》給林振強，她說：「我哋合作多次但未見過佢真人，可能我啲妹仔大師級唔會睬。」
歌詞影響林夕創作
填詞人林夕前晚在台下睇騷，大會播出他預先拍的短片：「自己好鍾意《儍女》：『穿起你的毛衣從此每天飾演你』，我幫王菲寫《曖昧》：『你的衣裳今天我在穿』，自滿咗一段日子，之後幫陳慧嫻寫《儍女的新衣》，最近重溫歌詞，睇到有句『只有將你的毛衣來轉借他多得你』，一盆冷水淋落嚟，原來林振強歌詞不經意入咗腦，我當然唔係直接抄襲，我唔會承認，但佢歌詞對我影響深入到唔係回頭諗番都唔知。」
No comments:
Post a Comment