點樣可以成為受人愛戴嘅DIVA？首先要唱歌好聽，仲有個樣要見得下人，唔使好靚，不過要有啲格，點講呢……即係好似梅艷芳、容祖兒，出道時俾人話醜，之後愈嚟愈紅，加埋搵到錢識得搵人搞下形象，再俾啲經理人、化妝師、助手響側邊湧下、讚下，唱片稍為好賣又傾獎成功，DIVA就係咁誕生！係咪咁易？以前唔係，依家大約係咁(最好屋企又有啲錢)。歷代DIVA需要有咩特質？我哋由五十年代開始睇。
南下的五十年代
五十年代嘅香港，娛樂事業仲係蠻荒期，撐住香港嘅DIVA，多數由上海南來，唱嘅唔係粵語流行曲，而係國語時代曲，同埋小調，即係周璇嘅《天涯歌女》嗰類，多數響三、四十年代已出道，代表人物有李香蘭、吳鶯音、白光同埋姚莉等，掹車邊嘅有張露，仲有就係形象前衛嘅葛蘭。
大膽天后張露
張露原名張秀英，早響三十年代參加電台比賽入行，依家仲有人提起佢，因為佢係杜德偉媽媽，歌唱風格多變嘅張露，響仲有人抱住「浸豬籠」觀念嘅年代，大膽唱出《給我一個吻》咁驚世駭俗，所以為人熟知，後嚟嫁人生仔先告別歌壇。
邪牌天后葛蘭
自幼已經習聲樂嘅葛蘭，擅演「十三點」角色，俗啲講即係邪牌，代表作有《星星、月亮、太陽》、《野玫瑰之戀》等，喺戲中葛蘭以新女性形象又唱又跳，當中喺《曼波女郎》演唱《Ja Jambo》嘅一段，豪情開放演繹，堪稱前衛經典。
銀嗓天后姚莉
早響四十年代，上海已經起朵「銀嗓子」嘅姚莉，五十年代南下來港，繼續歌唱事業，佢嘅威水史就巴閉喇！試過唱《玫瑰玫瑰我愛你》打入美國Billboard流行榜第三位，係首位打入美國音樂流行榜嘅華人歌星，其嘅名作無數，更加係多位女歌手嘅偶像。
本土化的六十年代
五十年代嘅戰後「嬰兒潮」，喺六十年代產生極大影響力，加上香港經濟、民生正值萌芽階段，香港開始出產本土嘅女性偶像，包括有「七公主」、「四朵金花」等，但能夠成為天后嘅，就只有兩位。
工廠天后陳寶珠
有「影迷公主」之稱嘅陳寶珠，自幼學習京劇，後來獲任劍輝賞識，收為入室弟子，年輕時經常喺古裝武俠片反串做男角，事業轉捩點係回復女兒身拍《彩色春青》，同蕭芳芳一齊成為萬人迷，其名曲《工廠妹萬歲》，令佢成為年輕女工嘅偶像，之後因為要湊楊天經，唔多願響幕前演出。
貴族天后蕭芳芳
如果陳寶珠係代表工人階級，咁蕭芳芳就係中產階級嘅代言人，芳芳姐出身富裕家庭，因為戰亂加上爸爸離世，所以家道中落，不過帶貴族氣質嘅佢，俾電影公司睇中，6歲已經開始接演文藝電影《小星淚》，間中仲會唱下電影主題曲同插曲，好似《媽媽好》、《保齡女郎》同《一樂也》等，喺1997年，更獲英女皇頒發MBE勳銜。
酒廊舞廳的七十年代
隨著香港經濟起飛， 市民有閒錢出外聽歌、跳舞尋找娛樂，造就一班酒廊、舞廳歌手開始紅起來，佢哋唔單止有fans晚晚捧場，仲憑住出色歌藝贏得唱片合約，繼而晉身成為殿堂級天后，而香港樂壇亦由時代曲年代，轉變為流行曲年代。
華人天后鄧麗君
響七十年代，有華人嘅地方，就有鄧麗君嘅歌聲。雖然「小鄧」來自台灣，不過響香港嘅酒廊舞廳起朵，仲被發掘去日本發展，因為咁而打開咗東南亞同日本市場，其名曲無數，曲風仲涉獵國語小調、粵語流行曲到J-Pop，最為人傳頌嘅，包括《甜蜜蜜》、《何日君再來》及《漫步人生路》等，可惜呢位天后突然哮喘病發離世，從此成為絕唱。
夜場天后徐小鳳
六十年代參加歌唱比賽出道嘅徐小鳳，係當年酒廊舞廳嘅台柱歌手，最鼎盛時期，有傳佢由茶舞時段下午2 點開始，一直走場唱到凌晨4 點， 因而練就一身超凡唱功，所以輕易而舉響紅館連開33場演唱會，紀錄至今無人能破。推出唱片初期，徐小鳳多數翻唱一啲國語流行曲，之後幫無綫劇集《大亨》唱主題曲，開始擁有個人主唱作品，奠定天后之作包括有《風雨同路》、《風的季節》及《順流逆流》等，而《喜氣洋洋》一曲，近年更加廣受「高登仔」再次關注。
百花齊放的八十年代
步入全球興盛嘅八十年代，香港樂壇進入輝煌嘅黃金年代，廣東歌嘅影響力，遍布所有華人地區，當時新人歌手輩出，舊歌手亦升格為殿堂級。
巨肺天后甄妮
澳門出世嘅甄妮，求學期間去咗台灣，因為個樣鬼鬼哋已被星探發掘，1977年下嫁傅聲而來港發展，佢歌聲瞭闊響亮、穿透力強，所以俾黃霑封為巨肺歌手，佢首張粵語專輯《奮鬥》，一推出兩個月內就賣咗25萬張，打破香港開埠以嚟嘅紀錄，風頭一直延續到八十年代初，名曲有《明日話今天》、《奮鬥》及《再度孤獨》，響首屆無綫《勁歌金曲頒獎典禮》上，獲「最受歡迎女歌星」獎項時，向旁邊嘅梅艷芳講：「今年俾我，你出年先攞！」點知一語講中，之後梅艷芳連奪5屆「最受歡迎女歌星」獎，甄妮又掛住生BB，所以減少產量。
絕代天后梅艷芳
梅艷芳被公認「香港之女」，喺短短40年嘅人生，佢嘅故事堪稱傳奇，佢同張國榮合唱嘅名曲《芳華絕代》，歌詞提到：「唯獨是天姿國色 不可一世 天生我高貴艷麗到底 顛倒眾生吹灰不費 收你做我的迷」道盡這位天后絕代芳華，無人能及。
四大天后的九十年代
梅艷芳宣布唔攞獎，造就咗一班女歌手上位，當中有傳媒吹捧出嚟嘅「四大天后」，而呢4位天后女歌手，都有一個共通點，就係八十年代已經出道，最紅時選擇結婚，或者生仔。
娘娘天后葉蒨文
葉蒨文雖然廣東話唔好，不過唱起歌嚟，反而字正腔圓。
佢啲歌硬係娘娘哋，好似《黎明不要來》、《祝福》同埋《焚心以火》等，1994年開始傳出同林子祥拍拖後開始減產，早前做下《星夢傳奇》評判打發時間。
HEA爆天后王菲
王菲點解多人愛戴？啲樂迷話鍾意佢有性格，啲歌另類得嚟好聽，歌聲更加冠絕中、港、台，以上事實無可否認，不過佢一副唔願撈咁款，開親演唱會永遠冇encore，荷包窄窄哋時，先出嚟唱番兩場，滿足下啲歌迷！
觀音天后鄭秀文
新秀出身嘅鄭秀文，當年能夠擊敗關淑怡同彭羚，晉身「四大天后」之列，轉捩點係同許志安嘅緋聞，兩人合唱歌曲《其實你心裏有沒有我》製造話題，令佢成為C1新聞人物，之後嘗試響影壇發展，加上開過幾場成功演唱會，忽然紅咗嘅佢，因態度差而被封「臭四」，2005年拍攝《長恨歌》時患抑鬱症，因此蟄伏兩年，後信主復出，天后魅力不減，演唱會場場爆滿，專輯《信者得愛》更響逆市中賣咗近10萬張，仲屢獲其他歌手邀請擔任演唱會嘉賓，由於有求必應，因為咁而獲封「鄭觀音」之好名。
耐力天后林憶蓮
能夠響貪新忘舊嘅樂壇風騷30年，林憶蓮由一位醜小鴨DJ 611，轉型做歌手扮日本妹唱《愛情I Don'tKnow》，雖然俾人笑到飛起，後期佢一連三輯《都市觸覺》系列，賣成熟感性，今年更以《蓋亞》專輯贏得台灣《金曲獎》大獎，憑嘅係勤力，不斷進修，學聲樂、學舞蹈、學樂器，所以響樂壇企得咁穩。
青黃不接千禧年
新舊交替嘅千禧年， 香港嘅 天后之名， 其實十分區域性，因為佢哋淨係可以響香港稱后，一去到台灣同內地，就未獲認同過，唔單止獎攞唔到，碟仲賣得非常差。
喊包天后楊千嬅
如果問你楊千嬅有咩金曲，係咪一時間噏唔出呢！不過你一定記得，佢每次響商台叱咤頒獎典禮上，攞親「我最喜愛女歌手獎」時都例牌大喊，封佢做「喊包天后」，完全實至名歸。
獎多天后容祖兒
容祖兒係香港樂壇歷史上攞獎最多嘅女歌手，佢唔單止打破咗梅艷芳同王菲嘅紀錄，就算連一眾前輩男歌手，好似「四大天王」咁，講到獎項都唔係佢嗰皮，不過佢上年響台灣推出國語專輯《Moment》，銷量就輸咗俾同期出碟嘅梁詠琪，所以證明，唔係獎多就等於最受歡迎。
掹車邊天后
香港樂壇盛極轉衰，一啲女歌手亦因為種種問題，差一點點就成為「天后傳奇」，可惜臨門脫腳，後續無力，導致未能喺一線企穩。
陳慧嫻：梅艷芳宣布退出，陳慧嫻憑《秋色》、《永遠是你的朋友》專輯上位，及後為學業暫休，可惜回歸後未能再次收復失地。
關淑怡：出道時唱大路情歌起家嘅佢，後期專挑另類歌曲嚟唱，好似《梵音》、《卡繆》及《DELA》等，由於曲高和寡，雖然有一線實力，可惜未攞過天后獎項，加上拍《春光乍洩》戲份俾王家衛剪晒，後嚟未婚懷孕，阻礙咗天后之路，千禧年復出後，光芒已經被後浪淹過。
李蕙敏：當年著歌曲《活得比你好》，有望更上一層樓嘅李蕙敏，做唔成天后，只怪紅歌唔紅人，同埋受盜版連累。
彭羚：唱功了得嘅彭羚，出道時個個睇好，名曲有《愛過痛過亦願等》、《彷彿是初戀》及《小玩意》，加上有商台力撐，所以有「商台家嫂」之名，可惜被林海峰私有化後，從此退出樂壇。
陳慧琳：當年阿蝦餃媽初出道時，樣靚身材正，而且專拍文藝電影，係天后嘅黑馬，到後嚟唱埋一堆揈頭歌，好似《失憶周末》、《花花宇宙》，響遍油、尖、旺嘅揈頭場，形象即時降格，加上要專心湊蝦餃仔，事業即時裹足不前。
No comments:
Post a Comment