頭條日報 : Shopping忙紮辮 43歲林憶蓮 依然貪靚

2010-01-08
由前年6月開始，林憶蓮便展開世界巡迴演唱搵真銀，以澳門一站作計算，個唱兩個鐘收60萬歌酬，已到過北京、新加坡、美加及澳洲等地舉行20多場演唱會的她的確相當和味。袋住大舊錢過肥年的憶蓮，日前便抽空同朋友往名店Shopping，雖然年過40又生過女，但平日愛行山的她依然Keep得唔錯，而且仲非常貪靚。在等找數期間便不斷以塗了指甲油的雙手撥弄髮髻，記得某名媛的金句:「有錢人唔貪靚係罪過。」看來憶蓮對此應該非常認同。
自04年與李宗盛離婚後，43歲的林憶蓮一直獨力撫養女兒成人，不過憶蓮有別一般單親媽媽，皆因她有一把靚聲及大量經典舊歌做Back Up，食老本開Show長搵長有，幫10歲喜兒儲定大量學費。
靚字行頭
日前下午，素顏憶蓮同女友到中環Joyce揀首飾，雖貴為巨星，但憶蓮唔多揀擇，十多分鐘便在一推首飾中揀了2千元的手鏈獎勵自己，碌卡找數後，一臉笑容的她與女友徒步走向IFC，先到NE-SPRESSO買咖啡豆，等候Sales服務期間，憶蓮不停用手撥弄髮髻，一次唔得再整第二次，前後搞足十多分鐘才滿意收手。之後，再到Pacific Coffee買咖啡，雖然並非出鏡，但憶蓮跟友人傾偈依然Keep住挺胸收腹，最後兩人再到連卡佛繼續血拼。