東方日報 : Fiona人格受辱啃唔落

2008-06-24
薛凱琪（Fiona）早前被網友選為「人見人憎」女星第五位，嫌她衣着騎呢兼扮可愛，但Fiona不屑理會，反而最嬲是人格被屈，試過被激到勁喊一場。
Fiona、張敬軒、謝安琪（Kay）和王菀之昨日出席《拉闊變奏廳》記者會，Fiona穿藍短裙襯白外套，以斯文look現身。對於網友選她為「人見人憎」女星第五位，Fiona不在乎地說：「梗唔覺得自己騎呢同扮可愛，我最憎人哋話我扮可愛，呢啲選舉最唔會令我唔開心，只係覺得好笑，唔會mind。」
被屈勁喊
心直口快的Fiona，坦言最介意是人格被屈，她說：「最mind有啲嘢唔係真，但又畀人寫咗，影響人格，唔開心到勁喊。」Fiona自認為人nice，怎料被屈囂寸，她激動地說：「可能嗰排冇乜新聞，有篇報道作咗我喺一個食嘢地方，同公司人一齊，撞到娛樂圈人，話我講其他藝人是非，又話我好囂，踩低人哋。」
被冤枉的Fiona深深不忿地說：「我根本冇去過，睇到報道好驚訝，屈其他嘢OK，但一個人嘅人格好重要！為呢件事，我喊咗一次，嗰期好多是非，好冤枉！」
另外，張敬軒將在八月一日演出變奏廳，屆時會獻唱林憶蓮的歌曲，他坦言感到壓力很大：「憶蓮好多fans，唔排除有佢fans嚟睇。」由於憶蓮獲男同志熱捧，記者即笑指到時會有同性戀者捧場，被傳「基民」身份的軒仔笑說：「歡迎各界人士參觀指導。」