2010-09-29
44歲天后林憶蓮，近年主攻大陸市場唱巡迴搵真銀，甚少現身香港露面，上週六（25日）卻忽然現身恭碩良演唱會擔任encore神秘嘉賓，還中女玩駁髮全身黑look變rock婆撐場，夠晒驚喜。
罕有露面撐恭碩良，據知憶蓮自年初因受有鼓王之稱的恭碩良吸引，成為舞台合作夥伴，更得33歲鼓王拉線，近日林天后埋堆由林建岳揼水、吳彥祖揸旗的新label「Revolution」。準備明年回歸香港出唱片兼開個唱的憶蓮，成功借恭碩良搭橋加盟岳少旗下。埋到岳少堆，憶蓮做一姐易過玩rock。
上週六（25日）晚的恭碩良演唱會，原本嘉賓名單只得張學友，但當晚林憶蓮竟變encore壓軸嘉賓，還與24味jam歌玩rock。恭碩良事後賣口乖：「唔同憶蓮合唱係禮貌，請嘉賓都要佢舒服，我一路都係打鼓。」
畀面派對
上月恭碩良於中環Backstage夜場開騷，憶蓮亦秘密現身，2人雖冇拍住影相，但見「巨星一班」參賽者伍浩然，分別與2人在同一場合影合照，就知憶蓮好畀面。
御用鼓手
2個月前憶蓮在大陸鄭州開巡迴騷，亦有邀請恭碩良上台打鼓，十足御用鼓手咁。
穿針引線
據知憶蓮一直欣賞恭碩良的音樂才華，今年上海舉行巡迴演唱會後，之後幾站亦有找恭碩良上台打鼓，更不斷狂sell他的鼓技。
剛巧碰上回歸樂壇的恭碩良，原來簽了由吳彥祖出任董事的新公司「Revolution」，而該公司亦是東亞老闆林建岳投資的新label。本刊得悉林憶蓮藉恭碩良的關係，將加盟「Revolution」。
2011出擊
知情人士透露：「憶蓮將簽畀吳彥祖，幫佢發行新碟，o依家差不多完成錄音工作。憶蓮之前已着手自己創作，仲搵埋大陸好出名嘅音樂人常石磊合作，但搵唔到唱片公司幫佢出碟，以前憶蓮喺『金牌』出到碟都係靠Paco，但Pacoo依家都失勢，其餘公司又冇門路，所以咪借恭碩良搭路加盟岳少旗下囉！」
憶蓮靠關係搵路數有前科，早幾年她與陳輝虹突然翻撻，有指她一心借陳輝虹搭路投身「金牌」，找後台幫她出碟及開騷。據知憶蓮已入紙申請2011年下半年的紅館檔期，而吳彥祖開設「Revolution」亦由岳少投資，所以下年的紅館騷順理成章由「東亞」一條龍主辦。計過度過，走唔過憶蓮雙眼！週一Revolution發言人Teresa對本刊說：「嗰晚同憶蓮合作得好愉快，暫時未聽聞佢加盟，可能將來會有合作機會呢！」
岳少愛集郵
「東亞娛樂」老闆林建岳，近年銳意發展娛樂王國，唔計開戲嘅寰亞電影、主力做唱片嘅除「東亞娛樂」外，近年更鍾意搵當紅藝人出任不同label的揸旗人，而每個label梗有1個一姐或一哥助陣，家陣憶蓮加盟旗下新公司「Revolution」，岳少差唔多集齊全港紅歌星郵票。
