農曆年飛咗去澳洲唱咗兩場演唱會嘅林憶蓮，繼續出動搵錢。上星期三（2月18日），佢應邀出席胡敏珊喺中環ifc開嘅Charmonde錶店開幕，同寧波車一齊主持剪綵儀式。
事隔兩日（二十日），林憶蓮為Audi喺將軍澳邵氏影城舉行嘅大型活動做表演嘉賓，演出20分鐘歌舞，二五要八珍估佢收幾多？
八珍竟然開口中，廿分鐘50萬袋袋平安。不過咁，受人錢財，林憶蓮亦無欺場，透視露黑bra，殺死人，令同場嘅名模周汶錡，又低V又換衫，一樣全無招架之力。
車show袋五50萬，咁幫胡敏珊剪綵，就算友情價，最少都要10萬啦！點知八珍呢次估錯，係零收費。事緣當日係由好友雲何婉薇出面請佢幫手，老友嗌到，從不二價嘅林憶蓮大方到錢都唔要，因為嗰間鋪雲太係股東之一，明冇！
雲何婉薇同林憶蓮一向老友，雲太出面叫到，憶蓮一個崩都唔收做剪綵嘉賓，咁幫手，雲太抱抱，胡小姐握手，多謝幫忙。
