早前，憶蓮個女喜兒由英國返咗嚟香港，陪媽咪慶祝母親節同生日，順便慶祝埋自己21歲生日，之後就飛咗去美國搵朋友。剛滿21歲嘅喜兒身材夠晒爆，最近，憶蓮亦有個好爆嘅傳聞，就係53歲嘅佢決定淡出樂壇，唔再出碟開騷。咁又係呀，憶蓮自從17年上內地做《歌手2017》及《夢想的聲音》後，就冇再接job做，連本身計劃開嘅20場巡迴演唱會都取消埋。6年冇出國語唱片嘅憶蓮，今年初以黑膠碟形式出咗隻全新國語專輯《0》，就係佢靜靜計劃好嘅告別樂壇之作。大家亦知道，佢低調嘅作風唔會特別宣布封咪退隱，只會淡淡退出。有台灣傳媒問過憶蓮經理人陳鎮川，佢冇否認憶蓮淡出樂壇嘅傳聞，表示會尊重佢，「Sandy做音樂和對工作的安排有明確的想法和主導權，我百分之百尊重她。至於未來還沒發生的事，將來再說。」
憶蓮係唔係退隱，大家睇吓6月29日佢現唔現身台灣出席第30屆金曲獎先知，不過，而家就有樣嘢肯定嘅，就係佢17年用咗2千5百萬，以現金一炮過畀晒，買咗間西貢別墅。一直住慣港島嘅憶蓮，選擇退隱樂壇，連住亦要搬離市區，十足歸隱田園咁。阿囡唔喺身邊，憶蓮會自己一個出動去超市掃貨，發福咗唔少嘅佢，就算搬咗入西貢，都唔怕遠，住司機車去港島區行超市。呢日憶蓮好似大廚上身咁，蔬果、肉類、海鮮、沙律bar、芝士乜都買，然後揀埋醋，認真大陣仗，少啲心機都唔得。聽聞佢本身都係個廚藝高手，煮嘢食嘅水準高過Chef LeMon，再睇埋佢而家個身形，應該係晚晚食好西。
掃完一輪貨，憶蓮排隊畀錢，準備回家做大廚，恭碩良就好啦，咁有口福！有口福還有口福，恭碩良都唔係唔做嘢嘅，好似就快開mini show嘅佢，近期忙緊度rundown同練歌！除咗玩音樂，恭碩良最近仲投資開車仔麵店，舖頭開正喺銅鑼灣中心位置，加上，佢自製咗啲醬料，每賣出一樽就港幣20蚊捐畀救狗之家，唔知屋企個大廚憶蓮有冇幫手調吓味呢？
No comments:
Post a Comment