歌手林憶蓮出席《Project WAO x 護苗基金 道謝愛心》記者會，為護苗基金會長蕭芳芳打氣，二人同時穿上紅色衫，甫見面即攬頭攬頸，又互錫面珠，憶蓮不慎走光。
對Project WAO移師香港舉行，憶蓮興奮地說：「今次香港站特別開心，因為香港係我屋企。今次收益會捐畀護苗基金，好有意思！我見到芳芳姐多年來嘅努力同付出，好感動，喚醒社會關注兒童被性侵犯嘅問題，呢次合作有意思、有意義！（想籌幾多錢？）愈多愈好，我去過探訪護苗基金，發現佢哋冇乜龐大經費，每日都努力籌緊錢，了解過之後，我覺得要鼎力支持！芳芳姐話想聽《至少還有你》，已經擺咗入歌單度，到時會唱。我、那英、張惠妹、蔡健雅當晚亦都會有好多互動。」
芳芳姐更即場向憶蓮、那英、阿妹、蔡健雅致送寫有「謝你們一萬年」的答謝卡，以示謝意。
蕭芳芳幫憶蓮「闢謠」變「劈友」？
護苗基金會長蕭芳芳與歌手林憶蓮現身銅鑼灣，出席「Project WAO x 護苗基金 道謝愛心記者會」。芳芳在記者會上更透過視像會議，分別與身處外地的台灣歌手蔡健雅、張惠妹，大陸歌手那英隔空對話，答謝眾人義唱為護苗基金籌款。
芳芳冇事業線靠光搭救
芳芳更一展其幽默作風，又叫那英做老師，又謂想參加《中國好聲音》，令那英急忙反指：「芳芳姐是表演藝術家，我叫你做老師才是！」芳芳在拍照時又自行拎反光板，她說：「我冇事業線，咁樣夠光，靚啲，編輯先會登，記得影得我風韻猶存啲！」
之後又揚言要為憶蓮「劈友」，芳芳說：「我要幫憶蓮『劈友』，外面傳演唱會啲飛已經賣晒，其實只係賣咗七、八成，仲有飛，歌迷們唔好失望！」身旁的憶蓮笑着幫芳芳姐更正：「『劈友』其實是『闢謠』。」芳芳說：「我耳仔唔好，廣東話講唔到。」
讚憶蓮少女時代不得了
芳芳又大讚憶蓮：「我幾十年前睇過憶蓮演唱會，憶蓮仲係少女，已經不得了，用心唱而且台風好勁，嗰時我未聾，仲識聽，後來聽唔到啦！但見好多樂評都讚佢每次都有突破，今次Project WAO搵受惠機構，憶蓮親自嚟，我哋傾咗好耐，我覺得憶蓮好勤力，用心做，有愛心又對身邊人好，咁都唔紅邊個紅呀？所以抵佢紅！」
芳芳姐再補充說：「我耳仔唔去得啲好嘈嘅地方，所以演唱會當晚唔出席，多謝大家體諒，我想憶蓮當晚唱《至少還有你》！其實今日出席呢個記者會，我返去都要瞓兩日，畀對耳仔抖番吓。」
No comments:
Post a Comment