壹週刊 : 陳輝虹唔使傾 林憶蓮 : 我信Paco

click to enlarge :


已經三年無在香港舉行個唱的林憶蓮，上週六（八月廿二日）在澳門威尼斯人酒店的金光綜藝館開騷，並透露稍後將會投入籌備明年的香港個唱，不過，對於會否交由合作開的「金牌大風」主辦，她說：「我以前同金牌合作，係因為信任Paco，而家同金牌再合作嘅機會頗微。」Paco大權被削，雖然舊愛陳輝虹跳升公司港區CEO，但憶蓮卻稱二人零接觸，態度斬釘截鐵。無聯絡
由去年六月開始，林憶蓮以南京作為世界巡迴演唱首站，分別到過北京、上海、昆明、新加坡、台北、美加及澳洲等地舉行十多場演唱會，上週六移師到澳門演出，十一月尾做完吉隆坡尾站後，明年會在香港開騷。
至於香港個唱會否交由剛「大執位」，雙方合作多年的金牌大風主辦？她擺明無面俾。「坦白講，我以前同金牌合作，係因為信任Paco，而家同金牌再合作嘅機會頗微。」
信任Paco，加上當時同陳輝虹是拍拖關係，自○五年憶蓮回歸樂壇出碟，雙方合作四年；○六年與陳輝虹分手，男方於數月後與音樂人黃丹儀閃電結婚。對於舊愛已跳升「金牌」香港區CEO，可有聯絡商量合作？憶蓮即劃清界線。「無！就算係，都唔使直接搵我，同幫我傾嘢嘅人傾就得！」

兩粒鐘60萬
跟以往一樣，憶蓮澳門個唱有大量大隻男支持，因為不少香港歌迷專誠到澳門睇騷，演唱會座位由原定五千加至八千位。
個唱兩小時收六十萬歌酬，憶蓮冇偷懶，在個唱上演繹《滾滾紅塵》、《當愛已成往事》、《至少還有你》及《愛上一個不回家的人》等廿多首歌曲；一開場便勁歌熱舞唱快歌《心野夜》及《逃離鋼筋森林》等，之後還有《傾斜》、《燒》及《灰色》等多part快歌，四十三歲寶刀未老，又唱又跳無難度。
向來身材逼爆的她，今次以四套黑白色包到冚歌衫亮相，沒有性感登場，只在穿上tube top及tubedress跳舞時，不經意露少少。其中一條黑色紮胸式長裙，因為箍實有礙換氣，憶蓮唱唱吓索性將紮在心口的皮飾拉低，變成腰封，全場起哄。