Monday, August 11, 2014

蘋果即時 : 【芳芳姐嚟喇!】艷光不減 影相自備反光板 代憶蓮「劈友」

建立時間: 0811 19:34
蕭芳芳今日以護苗基金會會長身份舉行「道謝愛心記者會」,答謝林憶蓮、那英、張惠妹及蔡健雅四位將演唱會收益捐獻給其基金,並於記招上逐一答謝佢哋。
以神秘嘉賓身份到場嘅憶蓮,甫出場即跟芳芳姐抱抱,豈料因憶蓮嘅上衣太鬆身,不慎走光露出白色厘士bra。
已有一段時間未有現身嘅芳芳姐,記招上大發笑彈,先係影相時拿出反光板話:「影得我風韻猶存啲,因為我冇事業線,所以要咁樣編輯先會出我張相。」之後芳芳姐又表示今個記者會係為憶蓮「劈友」,佢話:「今日我係要幫憶蓮劈友,個演唱會賣到7、8成嗰陣啲人就話冇晒飛,所以我要幫佢劈友,依家係仲有飛賣。」
在旁嘅憶蓮聞言即笑不矓咀,佢為芳芳姐解釋話:「係『闢謠』,因為普通話發音同劈友好似。」
由於芳芳姐聽力不佳,故記者會上憶蓮不時為佢充當傳譯員,芳芳姐則大讚憶蓮愛心爆棚:「今次合作真係開心到癲咗,我幾十年前睇過憶蓮嘅演唱會,當時佢仲係少女,而我仲未聾,當時已經覺得佢好用心,到之前同佢零距離接觸,我簡直愛上佢!佢係個好勤力好細心嘅人,抵佢喺樂壇咁紅企得咁硬!」
至於問到芳芳姐會否為演唱會擔任特別嘉賓?她則表示因為耳疾問題而不能擔任:「因為我耳仔問題,太嘈嘅地方會耳鳴,做完呢個記者會返去都要抖幾日先得。」

No comments: