Saturday, July 30, 2011

蘋果日報 : 林憶蓮一輩子深情


2011-07-30
有話兒:林憶蓮一輩子深情
撰文 : 胡比
林憶蓮的歌觸動人心,《至少還有你》、《多謝》、《當愛已成往事》和《一輩子心情》,首首都道盡愛情中會經歷的,這些歌又是否代表着憶蓮的愛情故事呢?45歲的她,經歷過失婚,與初戀情人愛火重燃卻未能開花結果,最近更傳出姊弟戀。現在憶蓮生活有女兒和小狗,可以做自己喜歡的音樂,比以前開朗學懂珍惜,想拍拖嗎?她說:「當然想,戀愛是開心事。」對!有誰不想被愛神眷顧。
林憶蓮近年愛上拍照,最愛與大自然接觸,拍下周圍的風光,留住身邊擁有過的景象,最近還收養了一頭小狗,閒時帶牠到郊外散步,問她有沒有猛男相伴?憶蓮笑說:「世上邊有咁多猛男呀?」找個人拍拖,不是猛男也可有個伴,她說:「遇上喜歡都想拍拖嘅,談戀愛係開心事,但係o依家嘅態度同以前有少少唔同,細個拍拖一定會想要將來,但人大咗就有唔同諗法,只係想搵一個愛嘅人,大家可以夾到,一齊好開心就得,要搵唔係咁易。」
薄皮因恭碩良改變
45 歲的憶蓮,經歷過與李宗盛的婚姻失敗,之後再與初戀情人陳輝虹愛火重燃,最後分手收場,到最近傳出與恭碩良(Jun)的姊弟戀,情路上雖然波折連連,但她依然對愛情充滿渴望,問她有否擔心女兒李喜兒會不接受?憶蓮說:「唔講個女。」答得斬釘截鐵,每個母親都希望保護自己的孩子,憶蓮也不例外。
憶蓮不是熱情的人,她歸咎於性格問題:「我性格比較緊張同怕醜,我唔係唔想做訪問,只係我面皮太薄。後來用心去聽同睇吓人哋喺網上嘅留言同評論,發覺有好多人寫嘢都好好,令我改觀咗。」身邊的工作夥伴,也是令憶蓮變開朗的原因之一,近幾年她專注做巡迴演唱會,有固定的音樂班底,憶蓮說:「佢哋成日都好開心好有趣,喺輕鬆的工作環境下,好多事都變得好funny,大家都抱住just be yourself,氣氛好好。」
Jun也是其班底之一,隨着合作機會越多,緋聞就傳出來了,問到是否Jun改變了她?她說:「係成班人,唔係只係得一個,Jun當然都係其中一個,佢係鬼仔性格,好玩得。」與對方傳緋聞後,有否感尷尬而考慮不合作?憶蓮說:「冇尷尬,唔會因為緋聞而影響我哋合作,大家都好尊重音樂,合作得好開心。」
痛失雙親更懂珍惜
人生每個階段都有不同的追求,會因經歷而改變,憶蓮有深刻的體會,現在她追求的是真實與真誠,她說:「o依家會做一啲自己鍾意嘅事,跟每個人嘅接觸都希望係好有誠意,生命太短暫,人生都好無常,既然有緣可以見面,就算只係相聚一個鐘,下次唔會再見,我都想彼此感覺都係美好嘅。」
是甚麼讓憶蓮無限感觸?她說:「可能係我媽咪同爹哋都過咗身,我爹哋因為心臟病去世,好突然,身邊都有年輕嘅朋友走咗,察覺到有好多事情,發生得好快,真係要好好珍惜。」
紅館派對Let's Dance
做自己喜歡的事,談何容易,但對於憶蓮當然比平常人易,尤其她對自己音樂的堅持,07年在九龍灣星匯開過五場演唱會,她自我地選擇,放棄大家耳熟能詳的歌,專挑冷門的,聽說口碑一般,憶蓮毫不介意,她說:「每個人感受都唔同,只係想每個演唱會都可以帶唔同驚喜畀樂迷。」
9月23至25在紅館舉行3場「林憶蓮演唱會MMXI」,今次憶蓮想與歌迷來個集體回憶,也希望大家可以關注地球暖化問題,舞台會將天與地倒轉,大眾的心水快歌應有盡有,她還將經典舞步重現台上,她笑說:「希望到時大家可以同我一齊跳,好似去咗一個party咁。」服裝方面,為了響應環保,將會採用以往穿過的服裝重新包裝,會有不少DIY的服飾,憶蓮說:「唔想只係隨便着某個牌子嘅裙,想要特別啲嘅。」

No comments: