2017-03-19 東網
最新播出一集內地歌唱節目《歌手》，觀眾嘅焦點又落喺天后林憶蓮身上，原因係憶蓮喺節目上，首次演唱廣東歌，仲要係另一天后王菲嘅經典歌《多得他》，片段上載咗去《歌手》嘅官方Facebook，只係15個鐘已經有超過三十萬點擊率，仲未計其他渠道收睇嘅人數，數字十分驚人。
片段中憶蓮以天籟之聲，唱出全新版本嘅《多得他》，為佢伴奏嘅人都非常不得了，除咗憶蓮好友倫永亮彈鋼琴之外，仲有男友恭碩良為佢打鼓，整個演出非常完美無瑕，聽到現場觀眾如癡如醉，就連同場參與嘅歌手彭佳慧都感動落淚。網民睇完片段後都紛紛留言力讚憶蓮嘅超水準表現係「殿堂級的歌聲！」、「我心中最愛的粵語歌之一，終於等到我最愛的女歌神重新演繹，用經典再創經典，只有林憶蓮」。亦有網民大食花生，以兩位天后嘅表現做大對決，不過部分網民就唔多同意用兩位天后嚟比較，其實憶蓮同王菲一早喺1994年合唱過同一首歌，咁多版本大家又鍾意邊個版本多啲呢？
3 comments:
好彩憶蓮無受嗰個話佢貪錢又話愛錯忠實歌迷影響，唔係就無機見到神級演唱
現在啲人好奇怪，為批評而批評，連店舖標錯價都可以駡，所以 Kung 講得對 ....... Less complaint Do more contributions to society
之前唔係有人話佢退賽，結果憶蓮越戰越勇；還有佢團隊全部精英，真係花費不少，一開始話佢貪錢的人，應該睇清楚才批評。
Post a Comment