演唱會內容同第一場冇咩分別，都係倫永亮同趙增熹對彈，佢哋彈貝多芬《第五交響曲》時，倫永亮唔知係真定係扮嘢，竟然唔啱拍子，又唔小心整到銅琴邊嘅咪架，好論盡。倫永亮有一節唱自己作畀張國榮、梅艷芳、林憶蓮嘅作品，唱到憶蓮嘅歌時，佢即展示有憶蓮以前舊唱片形象嘅衫：「我特登問過憶蓮可唔可以用呢張相，憶蓮話好，仲話可以令人諗起佢19、20歲嗰時。」
另一part係翻唱以前粵語片經典歌，倫永亮喺台上話：「今晚咁多前輩嚟，仙姐都有嚟睇，搞到我全晚都好緊張。」不過自稱見到仙姐好驚兼口窒窒嘅佢，轉個頭就拎仙姐嚟玩，佢哋講到仙姐有好多經典嘅表達聲音，Deanie姐叫倫永亮試吓扮，佢即刻扮仙姐用高8度嘅聲「呀」咗一聲，倫永亮又多謝寶珠姐捧場。
Deanie姐、倫永亮同趙增熹喺完騷後一齊受訪，佢哋都話今次個騷好玩又開心。問到得兩場係咪唔多夠喉？趙增熹話：「如果冇人買飛一定蝕，啲人可能見我哋3個好木獨，唔會似搞到個騷可以咁開心，結果比較辛苦，因為Deanie有啲名曲唔肯唱，今晚都只係唱咗3首經典歌。」Deanie姐就反指趙增熹好有唱歌potential。
原本第一場晚有啲鹹濕笑話，將粵語片年代嘅艷情片戲名講晒出嚟，但噚晚嗰場就cut咗，佢哋話見觀眾反應唔太好，所以唔再講。趙增熹又講到事前做咗一個資料調查關於粵語片嘅歌，諗過要用邊種方式表現出嚟，倫永亮就話本身剪咗兩分鐘嘅片，但要好貴版權費，用得少少就唔抵，所以最後冇用。
至於會唔會開巡迴演唱會？Deanie和倫永亮都話可以，趙增熹話：「唔蝕可以搞，最重要唔係要賺幾多，而係自己鍾意，又搵到兩個好歌手。」
No comments:
Post a Comment