蘋果日報 : 恭碩良愛蓮說 Slam I Love You

2015-07-03
與林憶蓮（Sandy）相戀4年多，不經不覺；恭碩良（Jun）由當初的絕口不提，到今日的有問必答，越愛越大方，更有意無意間放閃。由愛侶到工作夥伴到best friend，Jun比以往成熟沉穩，大家的Sandy如何成為了他的「Slam」，且聽不再暴躁的他從頭細數。
恭碩良早前推出新碟《Past, Future, Present Tense》，找來女友林憶蓮為其監製唱歌部份，他說：「搵佢係因為佢嘅經驗，同埋夠熟，我信得過佢。」每當遇上問題，Jun坦言會第一時間找憶蓮詢問意見：「例如寫咗份詞，會第一時間畀佢睇，聽吓佢意見。」Jun笑指自己就如餐廳的廚師，只懂準備好所有下廚材料，而憶蓮則是餐廳的揸弗人，管理整間餐廳和菜單。Jun坦言這張唱片嘔心瀝血，由作曲作詞、唱片設計與包裝也參與其中，他說：「唱片就好似歌手嘅卡片咁，送碟畀朋友、DJ，就等如派緊卡片，我一定要親手送唱片畀我嘅朋友。」Jun對送出唱片亦如斯執着，難免令人擔心在工作上與憶蓮會有磨擦，不過他卻表示：「大家玩音樂都唔短時間，有乜執着細個時都執着晒。」但他竟略嫌憶蓮未夠盡責：「佢對我唔夠執着同嚴謹，我搵佢監製中文歌，其中一個原因就係想佢執我啲音，唔想俾人覺得係鬼佬唱中文歌咁，但佢就反而覺得歪歪哋音幾有feel。」
專屬愛的呼喚
為鳴謝女友，Jun於碟內寫了一段愛的宣言，以「Slam」來稱呼憶蓮，文末又毫不避忌地寫上「I love you」，他說：「佢嗰段我係用好音樂去講，但我講所有嘢都係真嘅，我唔會喺呢個位怕醜！係！係我講嘅！我講嘅所有嘢都係真嘅！」Jun指「Slam」這個專稱，是方便他於公眾場合稱呼女友：「我同佢私下都會幫對方改花名，Slam係其中一個，因為喺外面唔方便叫佢全名。」遇上憶蓮後，不論是脾氣或是待人處事，Jun均承認有所轉變：「佢點做音樂，會啟發到我點做音樂，佢點處事待人，我亦都會喺佢身上學到點去處事待人，呢個影響係雙方嘅，有時我有啲位諗唔通，可能只要佢講一兩句，我就會明。」Jun透露與憶蓮同樣喜愛木結他的音質，有時二人閒逛琴行，只要聽到有人在彈木結他，他們均會即時停止手上工作，靜靜去享受這時刻。談到二人相處，Jun指很欣賞能視另一半為best friend的愛侶，因為人只會跟好友無所不談，他說：「Best friend係你無聊冇嘢做想去飲杯咖啡，就會搵佢去飲，我覺得兩個人一齊就係要咁。」
鼓佬基因Never Die
視鼓如命的恭碩良，兩年多前因為手腕骨移位而被迫停止打鼓。早前樂隊Mr.成員Tom亦受此病困擾，Jun就謂：「打鼓真係幾勞損，但外面啲人唔會知，有時真係要咬實牙關咁捱過去。」經過兩年物理治療，現時雙手康復了八成，但卻令Jun萌起高懸鼓棍的念頭：「係咪去到60歲都繼續幫人打鼓？雖然我好鍾意打，但唔想打鼓係我唯一可以賺錢嘅嘢。」
雖然一度打算放棄，但始終放不下至愛，Jun說：「𠵱家隻手好番好多，所以又手痕，之前都有同Paco（黃柏高）講過想再打吓，嚟緊暑假就會有tour，一半係自己嘅，一半係幫人打。」他又透露明年將會為女友林憶蓮演出：「Slam下年都會有tour，今年佢會先忙自己嘅專輯，我希望佢搵返佢想合作嘅人去合作，呢個係做專輯最好玩嘅地方，亦係我哋畀對方嘅自由。」