許志安一連四場的紅館演唱會終於完美落幕，尾場吸引鄺美雲、梁漢文夫婦、張衞健、劉浩龍、小肥、黃偉文、Alan＠Mr.及沈震軒等人捧場。安仔在尾場繼續唔錫身，剝衫赤膊大晒肌肉。而今場請來樂壇天后林憶蓮（Sandy）擔任嘉賓，二人一邊手拖手，一邊合唱憶蓮首本名曲《至少還有你》，安仔難得與偶像同台，顯得相當緊張，他口窒窒說：「真係太開心，好耐冇聽過Sandy現場唱歌。我依家拖住佢隻手，係咪好唔應該？我覺得10幾年前，我好鍾意呢隻歌，喺唔同地方都有唱過，今日可以喺呢個台一齊合唱呢首歌，簡直係成全咗我夢想，依家緊張得滯添！」
憶蓮亦表示感激安仔及黃柏高（Paco）邀請她擔任嘉賓：「大家畀啲掌聲安仔，佢好努力！」安仔續說：「Sandy好有心，邀請佢嗰時，我話唔可以只係唱一首歌，啲粉絲會唔放過我，佢就話『唱完《至》，唔會又慢歌啦？』，我就話好呀！唱快歌，我哋為大家準備咗小甜品！」
語畢，二人齊齊又唱又跳《傾斜》，憶蓮更興奮得扭籮拍手，之後安仔從後輕抱對方的纖腰，與憶蓮頭貼頭唱歌，令到全場High爆。憶蓮臨下台時，安仔不忘再三多謝對方：「Thank you Sandy，I love you，我仲有咩好講，真係唔話得，好感動。」
在鳴謝環節，全場粉絲大叫安仔太太的洋名，令他尷尬不已，最後新婚不久的安仔也順應民意，兩度在台上公開多謝許太，並怕怕醜醜欲言又止：「佢真係……都係唔講啦，多謝你，衷心多謝。」最後安仔兩度Encore，在點唱環節時，粉絲繼續大嗌許太的名字，安仔再施冧功即場自彈自唱《不要驚動愛情》，雖然忘記歌詞及彈錯，但勝在誠意搭夠，個唱最後在一片喝采聲中完結。
No comments:
Post a Comment