潘源良與林振強是惺惺相惜的好友，而林憶蓮與夏韶聲都唱過林振強不少作品。
【悼林振強15】因歌詞改變生命 倫永亮甘願做鋼琴後的人
「識英雄、重英雄」，音樂造詣非凡的倫永亮（Anthony），80、90年代遇上詞壇鬼才林振強（Richard），兩人一見如故，在音樂上共同創作經典金曲外，私下亦譜出一份珍而重之的友誼。闊別眼中的大哥哥15年，倫永亮心中仍是不捨，他慶幸有一位如此珍重的朋友在人生中擦身而過。
今年是林振強離世15周年，身為Richard好友兼工作伙伴的倫永亮，日前在尖沙嘴分享跟故友之間的點滴，Anthony指每次收到Richard的歌詞，都賦予自己無限靈感兼驚喜，皆因每次歌詞都會帶出新概念，Richard是一位很洞悉音樂的填詞人，Anthony回味說：「我哋每個歌手都係，林憶蓮、梅艷芳、呂方，每個收到歌詞都好開心，一唱落去就好順口，我覺得Richard最大長處係佢每寫一個字好fit個音，如果要唱高音，如果嗰字音唔係開口，係好難唱到。」
除了洞悉音樂的本領，Anthony不得不讚Richard的文筆，每份詞都有驚喜題材，最難忘是Richard為他填的第一首歌《乜歌》，Anthony說：「首歌好難唱，我寫出嚟係挑戰自己，啲字好密，佢真係好有心機填，而首歌後來被電台禁播，話歌詞係諷刺某啲公司運作，首歌係想講一個社會現象，好多人想上位就要識到邊個，巴結邊個拍馬屁，呢啲咁嘅橋就係Richard先夠膽諗出嚟。」Anthony表示好佩服故友的膽色。
80年代尾開始，兩人共同創作近30首作品，Anthony指每逢有特別主題，便會相約Richard食飯見面，記得當年有首歌叫《六月雪飛》，當日他跟Richard表達想寫首歌呈現一種無可能的現象，他說：「首歌我係想講個女仔鍾意咗男仔，其實係無可能，個男仔係結咗婚，女仔點渴望，好多時係你觸摸不到，只係希望有奇蹟發生。當時林振強就知道我意思，即刻動筆去寫。」眾多作品中，Anthony最感激Richard是《鋼琴後的人》，因為未有這首歌之前，他演出時偶然也會跳舞，亦自覺是舞林高手，但收到《鋼琴後的人》歌詞後，頓覺自己坐在鋼琴後自彈自唱，有點似Elton John和Billy Joel，為何還要辛苦地在台上跑來衝去跳舞？其實坐在鋼琴後同樣能夠發揮音樂力量，令他從此改變演出模式正是Richard的這份詞。
工作是戰友，私下是好友，Anthony感激對方將自己納入好友堆中，問到兩人認識情景？Anthony思考片刻笑說：「我記得，係透過林憶蓮，嗰時林憶蓮好多hit歌都係Richard所寫，我記得有次去Richard屋企，當時佢住太古城，我好開心，因為我未見過複式，我上到去竟然有個family有兩層，嘩好有錢，就咁識佢，仲識埋佢太太，我叫佢做素君姐姐，仲有佢個仔阿寶，佢好得意。」Anthony表示當年兩人主要以傳真機溝通，他又指Richard為人幽默：「佢寫咗份詞嚟，就會話此曲名亦可改為...跟住畀幾個歌名我選擇，佢有啲幽默remarks後面：『如果你揀第三個名，我包保首歌一定唔會紅嘅。』有時我回番佢，小人遵命，奴才該死，請饒恕！佢又會fax回來：奴才唔使死，因為我寫完首歌，我已經死，我無可能知道你會死。」
後來彼此友誼越來越深，每個月都會約食飯，全因當年他跟Richard、周禮茂及潘源良同屬EMI唱片，而當時顧嘉煇曾提醒他們要擁有自己創作的作品全部版權，得到前輩提點，他們便開始持有自己作品版權，所以每個月都相約食飯等唱片公司同事派發版權支票，藉此聚會再交流音樂心得。外界一向覺得林振強寡言，Anthony笑指即使跟他相熟，也未至於暢所欲言，最多只會幽默一點，Anthony說：「我好欣賞佢為人，好似我哋聽到首歌好垃圾，點解呢句咁？呢句melody咁跳？Richard就會話呢啲我櫃桶有好多。」
Anthony透露了一件跟Richard一家相處鮮為人知的事，他指Richard好錫兒子，而自己又愛鬼馬調皮，他說：「有時我會傳真謎語畀佢同阿寶，佢哋話每次收到謎語都會猜到天昏地暗，有時會傳真答案畀我，之後我又會覆番佢話錯，錯得好離譜。」這個猜謎語遊戲維持了1、2年，亦令彼此友誼更密切。
直至今日，Anthony都感激Richard視他為好友之一，回憶起最後一次見面，同樣是獲邀到對方屋企作客，Anthony感觸說：「喺佢第一次病好，佢請我食飯，同我講番病嘅過程，我都係嗰刻先知道佢病，知道佢康復咗，佢好開心，我都戥佢開心，後來知道佢又再次入瑪麗醫院ICU，之後我都無機會同唔方便探佢。」
話別15年了，問到最記掛故友甚麼？Anthony深呼吸一下說：「最記掛係呢個人曾經擦身而過，正如佢歌詞寫『在茫茫人海中與你相遇』，係一向幾真嘅話。」正如從街上接觸成為朋友，相約食飯昇華成知己，這份情是最懷緬，他續說：「佢係一個良師益友，差唔多係一個大哥哥，好少人同我分享咁多嘢，有次我好坦白咁問佢點睇生死？因為我有好多疑團諗唔開，佢就眼超超望住我：『呢啲嘢都好諗嘅，我唔諗！』」Antony回家細味對方一番話，便理解到這問題對人生旅程沒任何幫助，何不做好自己本份，寫好唱好自己的歌，Anthony再回想Richard的眼神說：「佢一定係藐我！」
No comments:
Post a Comment